ថ្នាក់ដឹកនាំខេត្តកណ្ដាល នាំយកអំណោយមនុស្សធម៌ប្រគល់ជូនប្រជាពលរដ្ឋរងគ្រោះដោយខ្យល់កន្ត្រាក់ ចំនួន ២០គ្រួសារ ក្នុងស្រុកកណ្ដាលស្ទឹង

 

កណ្តាល៖ នារសៀលថ្ងៃទី១០ ខែសីហា ឆ្នាំ២០២៦ ឯកឧត្ដម នូ សាខន ប្រធានក្រុមប្រឹក្សាខេត្តកណ្តាល និងឯកឧត្ដម គួច ចំរើន ប្រធានគណៈកម្មាធិការសាខាកាកបាទក្រហមកម្ពុជាខេត្ត និងជាអភិបាល នៃគណៈអភិបាលខេត្តកណ្ដាល បានអញ្ជើញចុះសួរសុខទុក្ខ និងនាំយកអំណោយមនុស្សធម៌របស់កាកបាទក្រហមកម្ពុជា ប្រគល់ជូនប្រជាពលរដ្ឋរងគ្រោះដោយខ្យល់កន្ត្រាក់ ចំនួន២០គ្រួសារ ស្ថិតនៅឃុំទ្រា ស្រុកកណ្ដាលស្ទឹង ខេត្តកណ្តាល។ 

មានប្រសាសន៍សំណេះសំណាល ឯកឧត្ដម គួច ចំរើន បាននាំមកនូវប្រសាសន៍ផ្ដាំផ្ញើសួរសុខទុក្ខ ពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូសុខទុក្ខរបស់ប្រជាពលរដ្ឋគ្រប់កាលៈទេសៈ ដោយមិនទុកប្រជាពលរដ្ឋណាម្នាក់ចោលឡើយ មិនតែប៉ុណ្ណោះ សម្ដេចក៏បានចូលរួមសោកស្ដាយចំពោះឧបទ្ទវហេតុគ្រោះថ្នាក់ខ្យល់កន្ត្រាក់នាពេលកន្លងមកនេះ និងអំពាវនាវឱ្យប្រជាពលរដ្ឋមេត្តាគិតគូរពីសុខភាព ដោយអនុវត្តអនាម័យជាប្រចាំ ដោយហូបស្អាត ផឹកស្អាត និងរស់នៅស្អាត។

ក្នុងឱកាសនោះដែរ ឯកឧត្ដម អភិបាលខេត្តកណ្ដាល បានថ្លែងអំណរគុណដល់អាជ្ញាធរគ្រប់លំដាប់ថ្នាក់ របស់ស្រុកកណ្ដាលស្ទឹង ដែលបានយកចិត្តទុកដាក់ជួយប្រជាពលរដ្ឋ និងបានរាយការណ៍ពីទុក្ខលំបាករបស់ប្រជាពលរដ្ឋនៅក្នុងមូលដ្ឋាន ជូនដល់សាខាកបាទក្រហមកម្ពុជាខេត្ត ដែលនេះសបញ្ជាក់ឱ្យឃើញពីការយកចិត្តទុកដាក់របស់អាជ្ញាធរជាមួយប្រជាពលរដ្ឋ។

បន្ថែមពីនេះ ឯកឧត្តម អភិបាលខេត្ត បានស្នើដល់ប្រជាពលរដ្ឋដែលរងគ្រោះដែលខ្យល់កន្ត្រាក់ សូមកុំមានការភ័យខ្លាចបន្តទៀត និងសូមបន្តប្រកបរបរចិញ្ចឹមជីវិតរបស់យើងបន្តទៀត ហើយជួសជុលនូវអ្វីដែលរងផលប៉ះពាល់នាពេលនេះ។

សូមជម្រាបជូនថា អំណោយដែលសាខាកាកបាទក្រហមកម្ពុជាខេត្តកណ្ដាល បានផ្ដល់ជូនគ្រួសាររងគ្រោះមួយគ្រួសារទទួលបាន៖ អង្ករ ២៥គីឡូក្រាម, មី ០១កេស, ទឹកសុទ្ធ ០១កេស, ត្រីខ ០១យួរ, ទឹកត្រី ០១យួរ, ទឹកស៊ីអ៊ីវ ០១យួរ, អាវមនុស្សធំ កូនក្មេង និងក្រមា ០១កញ្ចប់ និងថវិកា ២០ម៉ឺនរៀល៕

ប្រភព ៖ រដ្ឋបាលខេត្តកណ្ដាល